("Autant en emporte le vent"), aphorisme poétique immémorial, anonyme et sublime, déjà ancien du temps de Villon et sa magnifique :
"Ballade en vieil langage Françoys"
Car, ou soit ly sains apostolles,
D'aubes vestuz, d'amys coeffez,
Qui ne saint fors saintes estolles
Dont par le col prent ly mauffez,
De mal talent tout eschauffez,
Aussi bien meurt que cilz servans,
De ceste vie cy bouffez :
Autant en emporte ly vens.
Voire, ou soit de Constantinobles
L'emperieres au poing dorez,
Ou de France ly roy tres nobles
Sur tous autres roys decorez,
Qui, pour ly grans Dieux aourez,
Bastit eglises et couvens,
S'en son temps il fut honnourez,
Autant en emporte ly vens.
Ou soit de Vienne et de Grenobles
Ly Dauphins, ly preux, ly senez,
Ou de Dijon, Salins et Doles,
Ly sires et ly filz ainsnez,
Ou autant de leurs gens privez,
Heraulx, trompetes, poursuivans,
Ont ils bien bouté soubz le nez ?
Autant en emporte ly vens.
ENVOI
Princes à mort sont destinez,
Et tous autres qui sont vivans :
Si sont courciez ou attinez,
Autant en emporte ly vens.